Vëllai i ish-kryeministrit hungarez Viktor Orban, Áron Orban, është ndaluar nga autoritetet hungareze, nën dyshimin për përfshirje në trafikimin e qenieve njerëzore. Lajmi është bërë publik nga kryeministri hungarez Péter Magyar, i cili iu referua raportimeve të mediave për arrestimin e tij.

Përmes një reagimi në rrjetet sociale, Magyar bëri të ditur se hetimet po vijojnë nga Zyra Kombëtare për Rikuperimin dhe Mbrojtjen e Pasurive dhe Byroja Kombëtare e Hetimit.

Sipas mediave hungareze, operacioni është zhvilluar në Budapest dhe në disa zona të qarkut të Pestit, ku janë arrestuar disa persona dhe janë kryer kontrolle në banesa.

Áron Orban ishte përmendur më herët në një hetim që lidhej me skema të dyshuara për lehtësimin e marrjes së vizave Shengen nga shtetas të huaj. Kompania e lidhur me të dyshohet se kishte ndërmjetësuar regjistrimin e shtetasve vietnamezë në një kurs dyditor të ndihmës së shpejtë në Universitetin e Pécsit, procedurë që dyshohet se mund t’u lehtësonte pajisjen me viza.

Autoritetet hungareze pritet të japin më shumë detaje për operacionin dhe akuzat ndaj personave të ndaluar.