​Presidenti amerikan Donald Trump ka përshkallëzuar ndjeshëm retorikën ndaj Iranit, duke deklaruar se vendi “mund të shkatërrohet brenda një nate” dhe se kjo mund të ndodhë shumë shpejt, nëse nuk ka reagim lidhur me kërkesën amerikane për hapjen e Ngushticës së Hormuzit.
​Në të njëjtën kohë, ai ka vijuar të theksojë se operacionet ushtarake amerikane po ecin “jashtëzakonisht mirë”, duke vënë në pah kapacitetet dhe fuqinë e Ushtrisë amerikane. Trump e cilësoi si “shumë historik” edhe shpëtimin e dy anëtarëve të ekuipazhit të një avioni luftarak F-15, të rrëzuar mbi territorin iranian.
​Sipas tij, të dy pilotët arritën të katapultohen dhe përfunduan në tokë në zona të kontrolluara nga forcat iraniane, përfshirë elementë të lidhur me Gardën Revolucionare Islamike të Iranit. Ai përshkroi operacionin e shpëtimit si një ndërhyrje masive dhe me rrezik të lartë, ku ekipet u përballën me zjarr të rëndë armik dhe një helikopter u godit nga plumbat.
​Trump deklaroi gjithashtu se kishte urdhëruar Ushtrinë të bënte “çdo gjë të nevojshme” për të kthyer ushtarakët në shtëpi, duke përsëritur parimin “nuk lëmë asnjë amerikan pas”. Ai shtoi se njëri prej pilotëve ishte plagosur rëndë dhe kishte bërë përpjekje ekstreme për të sinjalizuar vendndodhjen, duke lëvizur në terren të vështirë ndërsa ishte i gjakosur.
​Operacioni, sipas tij, përfshiu një forcë të konsiderueshme: 155 avionë në total, përfshirë bombardues, avionë luftarakë, cisterna furnizimi në ajër dhe mjete shpëtimi. Ai theksoi se misioni u përmbyll me sukses, pa humbje nga ana e forcave amerikane dhe e përdori këtë si provë për të nënvizuar se Ushtria amerikane është “më e fuqishmja në botë”.
​Gjatë deklaratave të tij në Shtëpinë e Bardhë, Trump ka mbajtur kryesisht një ton të përgatitur, duke lexuar nga shënime të shkruara ndërsa përshkruante rrëzimin e avionit ushtarak amerikan dhe operacionin e shpëtimit në Iran. Megjithatë, siç ndodh shpesh në daljet e tij publike, ai ka devijuar herë pas here nga teksti për të shtuar komente spontane.

Ai deklaroi se Shtetet e Bashkuara janë “duke ecur jashtëzakonisht mirë” në konfliktin në vazhdim dhe paralajmëroi për një afat të afërt lidhur me veprime të mundshme ushtarake ndaj infrastrukturës energjetike dhe të transportit të Iranit, nëse nuk ka zhvillime lidhur me ngushticën strategjike të Hormuzit.
Në këtë kontekst, ai përdori një gjuhë shumë të ashpër, duke sugjeruar se vendi mund të përballet me pasoja të menjëhershme dhe shkatërruese.