Sekretari Shtetëror në Ministrinë e Politikës Sociale, Demografisë dhe të Rinjve, Fatmir Sabriu, mori pjesë në një panel diskutimi të organizuar nga EUSAIR, kushtuar politikave rinore si një shtyllë kyçe për të ardhmen evropiane të rajonit. Në këtë aktivitet morën pjesë përfaqësues të institucioneve, organizatave dhe ekspertë nga vendet e rajonit Adriatiko-Jonian, të cilët diskutuan sfidat dhe mundësitë për avancimin e pozicionit të të rinjve.

Në fjalimin e tij, Sekretari Shtetëror theksoi se politikat rinore nuk duhet të reduktohen në iniciativa individuale dhe masa afatshkurtra, por përkundrazi nevojiten zgjidhje sistemike dhe afatgjata që do të krijojnë kushte reale për zhvillim, përfshirje dhe perspektivë për të rinjtë.

Theks i veçantë u vu në zhvillimin e qendrave rinore si hapësira funksionale dhe të aksesueshme ku të rinjtë mund të fitojnë aftësi të reja, të nxisin kreativitetin e tyre, të marrin pjesë aktive në jetën shoqërore dhe të krijojnë ndryshime pozitive në komunitetet lokale. U theksua se këto qendra kanë një rol të rëndësishëm në përforcimin e pjesëmarrjes së të rinjve dhe ndërtimin e brezave aktivë dhe të përgjegjshëm.

Në panel u diskutua gjithashtu rëndësia e bashkëpunimit ndërinstitucional në krijimin e politikave gjithëpërfshirëse për të rinjtë. U theksua se të rinjtë duhet të përfshihen drejtpërdrejt në proceset e vendimmarrjes dhe zëri i tyre duhet të përfshihet në mënyrë thelbësore në ligje, strategji dhe politika publike.

Për më tepër, u theksua rëndësia e promovimit të vlerave evropiane dhe përforcimit të bashkëpunimit rajonal duke lidhur të rinjtë nga Maqedonia e Veriut me bashkëmoshatarët e tyre nga rajoni Adriatiko-Jonian. Shkëmbimi i përvojave, ideve dhe praktikave të mira është një hap i rëndësishëm drejt ndërtimit të një shoqërie më gjithëpërfshirëse, të lidhur dhe të orientuar drejt Evropës.

Ministria e Politikës Sociale, Demografisë dhe të  Rinjve mbetet e përkushtuar ndaj krijimit të politikave dhe masave që do t’u mundësojnë të rinjve të kenë më shumë mundësi për zhvillim personal dhe profesional, pjesëmarrje aktive dhe jetë cilësore. Prioriteti ynë është të krijojmë një shoqëri në të cilën të rinjtë do ta njohin të ardhmen e tyre këtu, në shtëpi, si bartës të barabartë dhe aktivë të ndryshimeve pozitive.