Një grup i gjerë profesorësh nga Universiteti i Tetovës, Universiteti i Evropës Juglindore dhe Universiteti “Nënë Tereza” kanë adresuar një letër të hapur drejtuar partive politike, Qeverisë dhe Ministrisë së Arsimit për të shprehur shqetësimet e tyre lidhur me Propozim-ligjin për arsimin e lartë. Përmes këtij reagimi publik, nënshkruesit vlerësojnë se disa nga zgjidhjet e propozuara përbëjnë një ndërhyrje serioze në autonominë universitare të garantuar me Kushtetutë, veçanërisht me parashikimin e “Këshillit Universitar”.

Sipas tyre, ky organ i ri, ku një pjesë e anëtarëve emërohen nga Qeveria, merr kompetenca zëvendësuese ndaj Senatit dhe Rektoratit, duke hapur rrugën për ndikim të drejtpërdrejtë politik në menaxhimin institucional. Përveç kësaj, profesorët alarmojnë se dispozitat që lejojnë shkrirjen ose fuzionimin e universiteteve me iniciativë të Ministrisë, pa pëlqimin e kualifikuar të njësive akademike, krijojnë pasiguri juridike dhe paqëndrueshmëri për stafin dhe studentët.

Pjesë e rëndësishme e kundërshtimit janë edhe kriteret e reja për avancime akademike dhe organizimin e studimeve të doktoraturës. Akademikët theksojnë se detyrimi për publikime në revista të indeksuara në Web of Science dhe aplikimi i H-index janë kushte pothuajse të paplotësueshme në fusha specifike, si shkencat shoqërore dhe humane, ku proceset e recensimit zgjasin shumë dhe numri i revistave është i kufizuar. Ata shprehin rrezikun se ky model do të margjinalizojë revistat shkencore kombëtare dhe do të krijojë pabarazi përmes kufizimit të studimeve të doktoraturës vetëm në katër universitetet e para të ranguara. Letra përfundon me thirrjen për tërheqjen ose rishikimin thelbësor të ligjit dhe hapjen e një debati të gjerë publik, duke këmbëngulur se vetëm përmes një partneriteti të mirëfilltë me komunitetin akademik mund të miratohet një ligj që realisht e avancon arsimin e lartë në Maqedoninë e Veriut.