Petar Bogojeski nga koalicioni qeveritar ka reaguar lidhur me kërkesat e studentëve shqiptarë për përdorimin e gjuhës shqipe në provimin e jurisprudencës, duke theksuar se testet zyrtare në Maqedoninë e Veriut zhvillohen në gjuhën maqedonase, shkruan Gazeta Flaka.

“KJO ËSHTË MAQEDONI dhe këtu testet zyrtare jepen në gjuhën maqedonase! Në Shqipëri në shqip! Në Serbi në serbisht! Në Bullgari në bullgarisht! Në Greqi në greqisht!”, ka shkruar Bogojeski.

Ai ka shtuar se në procedurat gjyqësore gjuha zyrtare është maqedonishtja dhe se kjo, sipas tij, bazohet edhe në Kushtetutë.

“Gjuha e vetme zyrtare në procedurat gjyqësore është gjuha maqedonase dhe kjo është kështu edhe sipas Kushtetutës dhe me votat e të gjitha partive shqiptare në Kuvend.” deklaroi Bogojeski.

Deklarata e tij vjen në kohën kur studentët shqiptarë po kërkojnë që provimi i jurisprudencës dhe provimet tjera profesionale të mund të zhvillohen edhe në gjuhën shqipe, duke iu referuar Ligjit për Përdorimin e Gjuhëve dhe të drejtës për përdorim zyrtar të shqipes në institucionet shtetërore.