„Pa këtë seksion, gjithçka tjetër që po bëjmë nuk do të kishte kuptim“, deklaroi kryeministri Hristijan Mickoski sot në fillimin e ndërtimit të autostradës Kërçovë – Bukojçani. Ai theksoi se me realizimin e këtij projekti përmbyllet koncepti për lidhjen e plotë autostradale të Shkupit me Ohri, por edhe realizohet orientimi strategjik i Qeverisë që Maqedonia të bëhet një udhëkryq i rëndësishëm europian i transportit, hekurudhor dhe energjetik.

Mickoski theksoi se ndërtimi i këtij seksioni paraqet një sfidë serioze inxhinierike, por edhe një pjesë kyçe të strategjisë infrastrukturore të shtetit.

„Gjithçka është thënë, unë nuk do të përsëris sa mbikalime, nivele të ndryshme, tunele e të ngjashme ka, sepse vërtet paraqet një sfidë nga aspekti inxhinierik. Tani po flas si inxhinier, jo si kryeministër. Por ajo që është e rëndësishme për mua është se pa këtë seksion, gjithçka tjetër që po bëjmë nuk do të kishte kuptim“, theksoi kryeministri.

Ai vuri në dukje se me fillimin e ndërtimit të seksionit Kërçovë – Bukojçani, projekti i plotë për lidhjen autostradale të Ohrit me kryeqytetin merr një tërësi të vërtetë.

Sipas Mickoskit, ky projekt është pjesë e vizionit më të gjerë të Qeverisë, të vendosur që në vitin 2024, që Maqedonia të zhvillohet si udhëkryq rajonal i bazuar në katër shtylla infrastrukturore.

„Sot po flasim për katër shtylla, dhe ato janë që të jemi udhëkryq i dy korridoreve paneuropiane, Korridori 8 dhe Korridori 10, në kuptim të infrastrukturës rrugore, infrastrukturës hekurudhore, energjetike dhe gazore“, theksoi Mickoski.

Kryeministri theksoi se investime të tilla infrastrukturore do të forcojnë rëndësinë gjeostrategjike të Maqedonisë dhe do të krijojnë mundësi të reja për zhvillim ekonomik, tërheqje investimesh dhe zhvillim të industrive moderne.

Me realizimin e projekteve infrastrukturore, sipas Mickoskit, shteti fiton vlerë të shtuar më të madhe dhe perspektiva të reja për qytetarët dhe ekonominë.