VMRO-DPMNE, përmes një komunikate për media, deklaroi se rasti i ujit të ndotur në Gostivar do të ketë epilog juridik dhe u bëri thirrje institucioneve kompetente që të zbardhin plotësisht rrethanat dhe të përcaktojnë përgjegjësinë eventuale.

Nga partia vlerësuan se pushteti lokal në Gostivar, i cili sipas tyre mbështetet nga LSDM, BDI dhe Arben Taravari, ka dështuar në menaxhimin e situatës. Po ashtu, VMRO-DPMNE kritikoi LSDM-në se nuk ka kërkuar përgjegjësi për ngjarjen.

Në komunikatë, VMRO-DPMNE bëri edhe një krahasim me rastin e Spitalit Modular në Tetovë, duke adresuar kritika ndaj ish-ministrit të Shëndetësisë, Venko Filipçe, dhe mënyrës se si, sipas partisë, është trajtuar ai rast.

VMRO-DPMNE thekson se institucionet do të veprojnë në përputhje me ligjin dhe se rasti i Gostivarit do të zbardhet plotësisht, duke shtuar se Qeveria mbetet në dispozicion të qytetarëve.