Presidenti Donald Trump ka shkarkuar nga detyra Prokuroren e Përgjithshme Pam Bondi, ndërkohë, zëvendësprokurori i Përgjithshëm Todd Blanche është caktuar si ushtrues detyre i përkohshëm në krye të këtij institucioni, sipas mediave amerikane.

Shkarkimi i Bondit vjen pas raportimeve se Trump ishte gjithnjë e më i pakënaqur me mënyrën se si ajo kishte trajtuar dosjet e Departamentit të Drejtësisë lidhur me të ndjerin, autor krimesh seksuale, Jeffrey Epstein, si dhe me dështimin e këtij institucioni për të ndjekur penalisht disa nga kundërshtarët politikë të presidentit.

Ky vendim vjen gjithashtu vetëm pak javë pasi Trump shkarkoi një tjetër anëtare të kabinetit, Kristi Noem, nga posti i sekretares së Sigurisë Kombëtare.

Noem u largua nga detyra pas reagimeve të forta ndaj zbatimit agresiv të politikave të emigracionit në Minnesota, që çuan në vrasjen me armë të dy shtetasve amerikanë nga agjentë federalë. Ajo u zëvendësua nga Markwayne Mullin, i cili deri vonë ishte senator i Shteteve të Bashkuara për Oklahoma

“Rëra në orën e saj po mbaron”, tha një burim për MS Now, duke theksuar se ditët e fundit Trump kishte diskutuar me republikanë dhe aleatë për largimin e Bondit.

Megjithatë, largimi i saj nuk është shpallur zyrtarisht dhe mbetet i paformalizuar, duke qenë i ndryshueshëm, sipas MS Now. Ndërkohë, deputetja republikane nga South Carolina, Nancy Mace, shkroi në platformën X: “Nëse raportimet se Lee Zeldin do të zëvendësojë Pam Bondin si Prokurore e Përgjithshme janë të vërteta, e mirëpres këtë vendim.”

“Bondi i trajtoi dosjet Epstein në mënyrë të tmerrshme dhe e përkeqësoi situatën më shumë sesa duhej për Presidentin Trump,” shtoi Mace. “Pres me padurim një Prokuror të ri të Përgjithshëm.”

Gjatë mandatit të tij të dytë, Trump ka qenë më i përmbajtur në shkarkimin e zyrtarëve të lartë krahasuar me mandatin e parë, i cili u karakterizua nga një seri largimesh të papritura, përfshirë edhe atë të Prokurorit të tij të parë të Përgjithshëm, Jeff Sessions.

Trump e shkarkoi Sessions në maj 2017 pasi ai u tërhoq nga mbikëqyrja e hetimit të Departamentit të Drejtësisë mbi kontaktet e fushatës presidenciale të vitit 2016 me rusët, çka çoi në emërimin e këshilltarit special Robert Mueller për të drejtuar hetimin.

Bondi shihet gjerësisht si përgjegjëse për menaxhimin e dobët të publikimit të dosjeve që lidhen me Epstein.

Pas rikthimit të Trump në Shtëpinë e Bardhë vitin e kaluar, Bondi fillimisht premtoi publikimin e dokumenteve të Departamentit të Drejtësisë mbi Epstein, një çështje që ka ngjallur interes të madh në bazën politike MAGA të presidentit.

Më pas ajo u tërhoq nga ky premtim, pasi shpërndau në mënyrë demonstrative dosje për influencerë të afërt me Trump në rrjetet sociale, të cilat rezultuan të përmbanin informacion tashmë publik mbi Epstein.