Ish-presidenti Stevo Pendarovski njoftoi se do të kthehej në politikë vetëm nëse krijohen kushte për formimin e një koalicioni serioz, të gjerë dhe të madh opozitar, i cili do të kishte shans të mposhtte pushtetin aktual.

Në një intervistë për “360 Shkallë” në RTVM 1, Pendarovski tha se në këtë moment nuk sheh supozime të tilla, por nuk e përjashton mundësinë që ato të krijohen në vitin e ardhshëm ose më vonë.

”Unë do të kthehesha në politikë vetëm me një kusht: nëse krijohen kushtet për të formuar një koalicion serioz, të gjerë dhe të madh opozitar që do të ketë shanse të përmbysë këtë pushtet. Nuk kam asnjë arsye tjetër për t’u kthyer në politikë. Në këtë moment, nëse më pyesni, sot nuk shoh se ka supozime të tilla. Por, nuk e përjashtoj që supozime të tilla të formohen mbase vitin e ardhshëm ose vitin pas tij”, deklaroi Pendarovski.
Ai vlerësoi se opozita, kështu siç është vitet e fundit, nuk mund ta mposhtë VMRO-DPMNE-në nëse nuk bashkohet.
Sipas tij, arsyeja pse pushteti vazhdon të ketë një rejting më të mirë nuk është sepse qeveris mirë, por për faktin se opozita nuk është e konsoliduar.

”Sepse opozita nuk është e konsoliduar. Nuk ka asnjë dyshim për këtë. Të gjitha shifrat tregojnë, përfshirë edhe zgjedhjet e fundit lokale, se VMRO-DPMNE për periudhën më të shkurtër kohore humbi më së shumti vota në historinë e fituesve parlamentarë në Maqedoni”, tha Pendarovski.

Ai shtoi se partia në pushtet arriti rezultat historik në zgjedhjet lokale vetëm sepse, siç tha ai, opozita ende nuk është rimëkëmbur nga humbja zgjedhore. Sipas tij, ai proces nuk ka filluar në vitin 2024, por zgjat pesë-gjashtë vjet, pas vendimeve të vështira politike si ndryshimi i emrit, rasti me PSP-në dhe çështje të tjera.
Pendarovski tha se mbështet paralajmërimin e liderit të LSDM-së, Venko Filipçe, për një koalicion të madh dhe masivizim të bllokut opozitar.
”Absolutisht. Nuk ka mënyrë tjetër që opozita, kështu siç është vitet e fundit, ta fitojë VMRO-në, partinë në pushtet, dhe ta largojë nga pushteti, nëse nuk bashkohet”, tha Pendarovski.
I pyetur nëse ka ambicie për të qenë lider i LSDM-së, Pendarovski u përgjigj negativisht.
”Jo, jo, jo – asnjëherë, sepse unë kam qenë aktiv politikisht rreth 20 vjet, gjithmonë me atë anë të ndarjes politike, le ta quajmë, ose në atë bllok, dhe këtë nuk e kam shfrytëzuar asnjëherë”, tha ai.
Ai gjithashtu hodhi poshtë spekulimet se po mendon të formojë një parti të re politike, duke vlerësuar se pohimet e tilla janë “spine standarde të partisë në pushtet” dhe se nuk vijnë nga LSDM, por nga VMRO-DPMNE.
Në intervistë, Pendarovski foli edhe për qasjen politike të LSDM-së në lidhje me ndryshimet kushtetuese dhe perspektivën evropiane. Sipas tij, është mirë që LSDM-ja ka një qëndrim të qartë për këtë çështje, por vlerësoi se në politikën praktike duhet të nxiten tema që sjellin pikë politike.
”Në politikë është mirë të kesh qëndrim, është mirë të kesh qëndrim të qartë. Më e mira është të mos e ndryshosh atë qëndrim ashtu siç fryn era. Është mirë, është shkëlqyeshëm që LSDM-ja e ka atë qëndrim. Unë e mbështes. E kam mbështetur edhe para tre-katër viteve.