Aktakuza e re kundër Artan Grubit për keqpërdorimet në Lotarinë Shtetërore duket se po hap edhe një front tjetër, brenda vetë BDI-së.
Ndërsa udhëheqësia e partisë i peshon me kujdes fjalët, nga kampi i Grubit po vijnë gjithnjë e më shumë akuza se ish-zëvendëskryeministri është lënë i vetëm për ta zhvilluar betejën e tij.
Aktivisti i lartë partiak i BDI-së, Artin Spahiu, deklaron publikisht se Grubi është lënë i vetëm në këtë betejë, „pa zërin dhe aktivitetin e organizatës sonë“, shkruan Bulevar.mk

Spahiu drejtpërdrejt e kritikon udhëheqjen aktuale të partisë, të cilën e quan „politbyro“, duke kujtuar se disa prej anëtarëve të saj i kanë ndërtuar pozitat e tyre pikërisht me mbështetjen e Grubit pas kongresit të partisë në dhjetor të vitit 2019 dhe zgjedhjeve të mëvonshme brendapartiake.

Veçanërisht e fortë është porosia e tij për ndryshimin e qëndrimit të funksionarëve ndaj Grubit.

„Dikush e quante ‘shef’, dikush ‘vëlla’, dikush ‘king’, ndërsa shumica ishin të ngjitur pas tij si kërmijtë pas pemës“, shkruan Spahiu, duke shtuar se tani qartë po shihet „kush është kush“.
Një mesazh të ngjashëm publikoi edhe pronari i portalit „Tetova Sot“, Rami Mislimi. Ai publikisht pyeti pse shumica e funksionarëve të lartë të BDI-së deri tani nuk kanë shprehur mbështetje personale për Grubin. Mislimi pyet se ku është solidariteti i njerëzve me të cilët Grubi për vite të tëra e ka ndarë pushtetin, vendimmarrjen dhe përgjegjësinë politike. Sipas tij, nuk kërkohet ndërhyrje në drejtësi, por të paktën një qëndrim njerëzor dhe moral ndaj një ish-bashkëpunëtori.
Këto reagime publike tregojnë se rasti i Grubit tashmë nuk po krijon presion vetëm mbi ish-zëvendëskryeministrin. Ai ka filluar të hapë edhe një përplasje të brendshme mes mbështetësve të tij dhe funksionarëve të BDI-së.
Në të njëjtën kohë, nga partia vijnë mesazhe të ndryshme.

Fillimisht, BDI-ja shmangte përmendjen e drejtpërdrejtë të emrit të Grubit, ndërsa më pas doli me pretendimin se kundër tij nuk ka prova.
Ali Ahmeti, nga ana tjetër, dërgoi një mesazh tjetër. Sipas fjalëve të tij, ai i ka thënë Grubit se duhet të përgjigjet nëse e ka keqpërdorur besimin e tij. Por menjëherë më pas tha se „gjëja e parë“ është që Grubi të lirohet nga arresti shtëpiak.

BDI-ja tani ndodhet përballë një dileme të pakëndshme politike. Nëse e mbron pa rezerva Grubin, merr përsipër edhe barrën politike të gjithçkaje që mund të dalë gjatë gjykimit. Nëse fillon të distancohet, do të duhet të shpjegojë pse njeriu që për vite me radhë konsiderohej një nga bashkëpunëtorët më të afërt të Ahmetit tani është lënë pa mbështetjen e bashkëpartiakëve të deridjeshëm.

Kundër ish-zëvendëskryeministrit Artan Grubi, ish-drejtorit të Lotarisë Shtetërore, Prparim Bajrami, dhe gjashtë personave të tjerë tashmë është ngritur aktakuzë.
Gjykimi është caktuar të fillojë më 24 gusht, ndërsa Grubi vazhdon të jetë në arrest shtëpiak.

Linqet, e statuseve:

https://www.facebook.com/share/p/1D6eBoZtHU/

https://www.facebook.com/share/p/1EXJsbJntZ/