Një lajm që ka tronditur botën e boksit vjen nga Floyd Mayweather Jr.. Legjenda amerikane, që do të mbushë 49 vjeç në ditët në vijim, ka konfirmuar rikthimin në ring pas nëntë vitesh larg garave zyrtare profesionale.

Ky është rikthimi i katërt nga pensioni për ish-kampionin e pamposhtur. Ai ishte tërhequr fillimisht në vitin 2007, më pas në 2015 dhe përfundimisht në 2017, pas duelit spektakolar ndaj Conor McGregor, kur e mbylli karrierën me bilancin perfekt 50 fitore dhe asnjë humbje. Që prej asaj kohe, Mayweather ka zhvilluar disa ndeshje “show”, përfshirë edhe përballjen e fundit në prill ndaj Mike Tyson.

Sipas burimeve pranë kampionit amerikan, ai do të rikthehet në ringun profesionist në verën e vitit 2026, ndërsa emri i kundërshtarit do të zyrtarizohet më vonë. Mayweather ka deklaruar me bindje se objektivi i tij është të vendosë rekorde të reja financiare dhe sportive.

“Unë ende kam atë që duhet për të vendosur më shumë rekorde në sportin e boksit. Askush nuk do të gjenerojë fitime më të mëdha dhe nuk do të ketë audiencë globale më të madhe se sfidat e mia”, është shprehur ai.

Gjatë një karriere që zgjati tri dekada, Mayweather mposhti emrat më të mëdhenj të epokës, përfshirë Manny Pacquiao-n dhe Canelo Álvarez, duke qenë protagonist në tri nga duelet më fitimprurëse në historinë e boksit. Tashmë, bota pret të shohë nëse “Money” do të arrijë sërish të dominojë skenën globale.