Irani ka njoftuar zyrtarisht se Mojtaba Khamenei, djali i Ajatollahut të vrarë Ali Khamenei, është zgjedhur si Lideri i ri Suprem i vendit, duke siguruar kështu vazhdimësinë e pushtetit në duart e rrymës konservatore. Lajmi u konfirmua nga Ajatollah Hosseinali Eshkevari, anëtar i Kuvendit të Ekspertëve, i cili deklaroi se procesi i votimit ka përfunduar dhe emri do të shpallet së shpejti, me mesazhin e prerë se “emri i Khameneit do të vazhdojë”. Ky emërim vjen në një moment kritik, pas vrasjes së Ali Khameneit gjatë ditës së parë të sulmeve të koordinuara amerikano-izraelite mbi Iranin.
Zgjedhja e liderit të ri është pritur me paralajmërime të ashpra nga Uashingtoni dhe Tel Avivi. Presidenti i SHBA-së, Donald Trump, ka deklaruar prerazi se pasardhësi i Khameneit duhet të ketë miratimin e SHBA-së, duke shtuar se “nëse nuk merr pëlqimin tonë, nuk do të zgjasë shumë”. Nga ana tjetër, Kryeministri izraelit Benjamin Netanyahu ka premtuar se sulmet kundër udhëheqësisë iraniane do të vazhdojnë pa mëshirë. Ky kërcënim u konkretizua me vrasjen e fundit të Abolkasem Babayan, shefit të sapoemëruar të kabinetit ushtarak të Liderit Suprem, duke dëshmuar se Izraeli po shënjestron drejtpërdrejt hallkat më të larta të pushtetit në Teheran.