Kryetari i LSDM-së, Venko Filipçe, në paraqitjen e tij sonte në emisionin „Klik Plus“ në TV21 deklaroi se pret që në vend të mbahen zgjedhje të parakohshme parlamentare, duke vlerësuar se pushteti aktual do të përballet me sfida serioze politike dhe ekonomike.

Ai rikujtoi deklaratat e mëparshme të kryeministrit Hristijan Mickoski, në të cilat, sipas tij, ishte theksuar se zgjedhjet do të mbahen në afatin e rregullt dhe se nuk do të ketë votim të parakohshëm. Megjithatë, Filipçe tha se është i bindur se situata politike dhe ekonomike do të çojë në shpalljen e zgjedhjeve të parakohshme.

Sipas tij, gjendja me buxhetin e shtetit është serioze, me rritje të deficitit dhe presion mbi pagesën e pagave dhe detyrimeve ndaj fondeve. Filipçe theksoi se çështja e sigurimit të mjeteve financiare po bëhet gjithnjë e më aktuale.

Ai shtoi se po merren edhe kredi të reja me kushte që, sipas tij, nuk janë mjaftueshëm transparente, gjë që e rrit edhe më shumë pasigurinë financiare në vend.

Filipçe paralajmëroi se pakënaqësia e qytetarëve do të rritet, sidomos në kushte të presionit ekonomik dhe protestave të paralajmëruara nga sindikatat. Sipas tij, Qeveria nuk ka përgjigje të duhur për këto sfida dhe do të përballet me revoltë në rritje nga opinioni publik.

Në paraqitjen e tij, lideri i LSDM-së e kritikoi punën e Qeverisë, duke vlerësuar se mungojnë kapaciteti, përvoja dhe vullneti për përmirësimin e gjendjes në shtet.