Drejtori i Spitalit Klinik në Tetovë, dr. spec. Erzen Elezi, ka zhvilluar një takim zyrtar me ministrin e Ekologjisë, Muhamet Hoxha, ku në fokus ka qenë përmirësimi i sistemit të ngrohjes në këtë institucion shëndetësor.

Sipas njoftimit, gjatë takimit është diskutuar mundësia e zëvendësimit të sistemit aktual të ngrohjes me naftë me një sistem më modern dhe ekologjik, të bazuar në gaz natyror. Ky ndryshim synon reduktimin e ndotjes së ajrit dhe përmirësimin e cilësisë së jetesës për qytetarët e Tetovës.

Ministri Hoxha ka theksuar se përmirësimi i cilësisë së ajrit mbetet prioritet, duke nënvizuar rëndësinë e projekteve të tilla për uljen e emetimeve të dëmshme dhe avancimin e standardeve mjedisore.

Nga ana tjetër, drejtori Elezi ka vënë në dukje se sistemi aktual i ngrohjes është i amortizuar dhe me kosto të lartë, duke theksuar nevojën urgjente për investime në këtë drejtim.

Në përfundim, palët janë dakorduar për hapa konkretë në realizimin e projektit, i cili pritet të ndikojë drejtpërdrejt në përmirësimin e cilësisë së ajrit në Tetovë.

Postimi i plotë:

“Sot, drejtori i Spitalit Klinik në Tetovë, dr. spec. Erzen Elezi, priti në një takim zyrtar ministrin e Ekologjisë, Muhamet Hoxha, së bashku me ekipin e tij nga ministria.

Takimi u fokusua në një çështje me rëndësi të veçantë për mjedisin dhe shëndetin publik, konkretisht në modernizimin e sistemit të ngrohjes në këtë institucion shëndetësor.

Gjatë takimit, u shqyrtua mundësia e kalimit nga sistemi ekzistues i ngrohjes me naftë në një sistem më bashkëkohor dhe më miqësor ndaj mjedisit, bazuar në përdorimin e gazit natyror. Ky transformim përfaqëson një hap të rëndësishëm në drejtim të reduktimit të ndotjes së ajrit, përmes uljes së emetimeve të gazeve të dëmshme që rezultojnë nga përdorimi i naftës, duke kontribuar drejtpërdrejt në përmirësimin e cilësisë së ajrit në Tetovë.

Ministri Hoxha theksoi se përmirësimi i cilësisë së ajrit mbetet një nga prioritetet kryesore të ministrisë, duke nënvizuar se realizimi i projekteve të tilla ka ndikim të drejtpërdrejtë në uljen e ndotjes dhe avancimin e standardeve mjedisore. Ai shtoi se përdorimi i gazit si alternativë më ekologjike do të ndikojë në përmirësimin e përgjithshëm të ajrit në Tetovë, qytet i cili vazhdimisht përballet me sfida në këtë drejtim.

Nga ana e tij, drejtori Elezi theksoi nevojën urgjente për realizimin e këtij investimi, duke vënë në pah se sistemi aktual i ngrohjes me naftë është i amortizuar, ekonomikisht më i kushtueshëm dhe me ndikim të konsiderueshëm negativ në mjedis. Ai gjithashtu shprehu gatishmërinë për bashkëpunim të vazhdueshëm institucional në funksion të implementimit të këtij projekti.

Në përfundim të takimit, palët u dakorduan për ndërmarrjen e hapave konkretë në fazat e ardhshme, me qëllim realizimin e projektit për sistemin e ri të ngrohjes, duke synuar përmirësimin e cilësisë së ajrit dhe mbrojtjen e mjedisit në Tetovë”, ka përfunduar Elezi.