Italia ka refuzuar lejen që avionët ushtarakë amerikanë të ulen në bazën ajrore Sigonella në Siçili para se të fluturonin drejt Lindjes së Mesme, tha të martën një burim i afërt me çështjen.

Sipas gazetës italiane Corriere della Sera, “disa bombardues amerikanë” ishin planifikuar të uleshin në bazën në lindje të Siçilisë para se të niseshin për në Lindjen e Mesme. Nuk u bë e ditur se kur ishin parashikuar të uleshin.

Corriere della Sera shtoi se leja nuk u dha pasi SHBA-ja nuk kishte kërkuar autorizim dhe udhëheqja ushtarake e Italisë nuk ishte konsultuar, siç kërkohet nga traktatet që rregullojnë përdorimin e instalacioneve ushtarake amerikane në vend.

Ndërkohë, Ministria e Mbrojtjes në Itali nuk ka bërë koment të menjëhershëm.

Partitë opozitare të qendrës së majtë kanë kërkuar nga qeveria që të bllokojë përdorimin e bazave nga SHBA-ja për të shmangur përfshirjen në konflikt.

Qeveria e djathtë e Kryeministres Giorgia Meloni ka thënë se do të kërkojë autorizim parlamentar në rast se bëhen kërkesa të tilla.